Roman Abramoviç duket se ka gjetur një zgjidhje për t’u kthyer në Britaninë e Madhe pasi qeveria angleze nuk i ka rinovuar vizën, për shkak të lidhjes së tij të ngushtë me Vladimir Putin. Por, falë origjinës së tij, ai mund të marrë një pasaportë izraelite dhe të kthehet te Çellsi. Izraeli, në fakt, nuk është në listën e zezë të qeverisë angleze. Një gjetje origjinale, që mund ta lejojë presidentin e “Bluve” të kthehet shumë shpejt dhe të merret me bizneset e shumta që ka në Britaninë e Madhe. Por edhe për të mbyllur çështjen e trajnerit të ri, që duhet të jetë Maurizio Sarri. Ky lajm ka bërë xhiron e botës dhe ka shkaktuar shumë reagime në rrjetet sociale. Një nga këto ka vënë në dukje se Abramoviç do të bëhej më i pasuri i Izraelit, ndërsa një tjetër, tifoz i Makabi Netanja, ekip i kategorisë së dytë, i ka kërkuar të blejë skuadrën e tij të zemrës.