Karajanov më i sigurt me targat serbe

Nga MPB-në e Kosovës tregojnë se vite me radhë, Republika e Kosovës ka targat e saja të reja diplomatike të pranuara ndërkombëtarisht me kodin RKS. Nga ana tjetër, ambasadori Karajnov është arsyetuar se targat me SRB janë marrë në Serbi, ndërkohë që me këtë veturë lëviz lirshëm edhe në pjesën e veriut të Kosovës

Shkup, 28 prill - Vetura zyrtare e ambasadorit të Maqedonisë në Kosovë, Stojan Karajanov plotë shtatë vite qarkullon nëpër Kosovë me targa diplomatike zyrtare të Serbisë. Ndryshe nga veturat tjera diplomatike në Kosovë, që kanë tabelat RKS, Karajanov në një prononcim për gazetën KOHA ka thënë se vetura diplomatike 'Skoda Oktavia' është regjistruar në Serbi dhe se kjo është bërë për çështje sigurie, për shkak se, siç ka thënë ai, kur udhëton për në Serbi, të mund të kalojë lirshëm veriun e Kosovës dhe kufirin e Serbisë. Ai është arsyetuar se sikur të kishte targa diplomatike me RKS-në, atëherë nuk do të mundej të futej.

Me këtë deklaratë, Karajanov e ka përgënjeshtruar zëdhënësin e MPJ-së në Shkup, Borçe Stamov, i cili ditë më parë tha se targat e veturës zyrtare me SRB janë dhënë pikërisht nga shteti i Kosovës. Në Ministrinë e Punëve të Brendshme në Prishtinë informojnë se Kosova tashmë vite me radhë, ka siguruar targat diplomatike për veturat zyrtare me parashtesën RKS, ndërkohë që ditëve në vijim, do të shqyrtojnë rastin e ambasadës së Maqedonisë, ambasadori e së cilës nëpër Kosovë shëtitet me targa të shtetit serb.

"Do ta shqyrtojmë këtë rast dhe nëse me të vërtet vetura diplomatike e ambasadorit të Maqedonisë mban targa serbe, atëherë me siguri se do t'i ndalohet kësaj veture të qarkullojnë lirshëm nëpër rrugët e Republikës së Kosovës", thonë në kabinetin e ministrit të Brendshëm të Kosovës, Bajram Rexhepi. Kanë reaguar edhe ish-diplomat shqiptarë, të cilët skandalin e ambasadës së Maqedonisë e kanë vlerësuar si presedan diplomatik të paparë deri tani. "Është një presedan i paraparë deri më sot në qarqet diplomatike. Një gjest i këtillë i ambasadorit të Maqedonisë tregon për mirësjellje të keqe diplomatike ndaj Republikës së Kosovës. Gjithashtu, paraqet provokim të rëndë për Kosovën si shteti i vetëm fqinj që ka marrëdhënie të mira me Maqedoninë. Republika e Kosovës duhet urgjentisht të merr masa dhe ta dëbojë ambasadorin e Maqedonisë, si dhe ta shpall person non-grata. Gjithashtu, Ministria e Punëve të Jashtme të Kosovës të dërgojë notë proteste deri të Ministria e Punëve të Jashtme të Maqedonisë dhe të kërkoj ta tërheqin këtë farë ambasadori", ka thënë Alajdin Demiri, ish ambasador i Maqedonisë në Zvicër. Ndryshe, ditë më parë, zëdhënësi i MPJ-së fillimisht mohoi që vetura zyrtare me targa të shtetit serb të jetë e ambasadës së Maqedonisë, që më pas, të deklarojë se vet Qeveria e Kosovës diplomatëve u ka ndarë targa të tilla. (Zejnulla Veseli/KOHA)