BNJVL shënon 40 vjetorin

Bashkësia e Njësive të Vetëqeverisjes Lokale të Republikës së Maqedonisë-BNJVL sot po shënon 40 vjetorin e themelimit. Ministri i Vetëqeverisjes Lokale, Nevzat Bejta, i cili mori pjesë në këtë ngjarje, tha se sukseset e veta, kjo organizatë i ka arritur në periudhën e sistemit pluralist dhe demokratik dhe ka dhënë kontributin e saj në afirmimin e komunave, njohjen e kryetarëve të komunave midis veti dhe kulminacionin e arriti me fillimin e decentralizimit të pushtetit.

“BNJVL-ja në periudhën e pluralizmit dhe demokracisë, në bashkëpunim me komunat dhe qeverinë, kontribuoi edhe në përpilimin e shumë ligjeve të cilët shkojnë në interes të komunave dhe në interes të qytetarëve, siç është Ligji për financimin e komunave, ligji për menaxhim me tokat ndërtimore shtetërore, ligji për zhvillim të barabartë regjional, ligji për bashkëpunim ndër-komunal dhe shumë ligje të tjera”, tha ministri Bejta. Ministri Bejta, gjithashtu u ndal edhe në periudhën kur ai ka qenë nënkryetar i BNJVL-së në periudhën 2005-2009. 

“Kam arsye të veçantë të jem krenar, për të gjithë këto të arritura, sepse edhe unë si ish kryetar i Komunës së Gostivarit,  për kate vite kam qenë edhe nënkryetar i BNJVL-së. Gjatë kësaj periudhe së bashku me kolegët e mi, dhamë kontribut në zhvillimin dhe përparimin e BNJVL-së. Ne ishim të parët që e filluam procesin e decentralizimit, me çka filluan që të zhvillohen komunat  në vendin tonë. Besoj se edhe në të ardhmen kjo organizatë do të punojë në interes të gjithë komunave, do të jetë zëri i vërtetë i tyre. BNJVL-ja duhet të jetë e para që do ta ngrejë zërin në padrejtësitë që do tu bëhen kryetarëve të komunave”, u shpreh në fjalimin e tij ministri Bejta. Të pranishmëve iu drejtua edhe kryetari aktual i BNJVL-së dhe kryetar i Qytetit të Shkupit Koce Trajanovski, zëvendëskryeministri për Çështje Ekonomike Vlladimir Peshevski, euroambasadori Aivo Orav, ambasadori i SHBA-së Pol Uollers dhe Stefano Lazaroto, ambasador i Zvicrës në Maqedoni. Me rastin e 40-vjetorit të themelimit, nga BNJVL-ja kishin përgatitur edhe monografi "40 vjet në shërbim të komunave", të cilën e promovuan gjatë organizimit të jubileut. Monografia paraqet memorie 40-vjeçare për zhvillimin e bashkësisë, reformave të saj strukturore në kontekst të ndryshime politiko shoqërore të pushtetit lokal.