Shqipëria partnere e fuqishme e SHBA-së

Në kuadër të vizitës së tij në SHBA, kryeministri Berisha zhvilloi një takim me Sekretaren Amerikane të Shtetit, Hillary Clinton. Në një prononcim të shkurtër për mediat, përpara nisjes së takimit, sekretarja Clinton theksoi se Shqipëria mbetet partnere e fortë e SHBA-ve, ndërsa vlerësoi si mjaft të mira marrëdhëniet mes dy vendeve. “Është një nder të mirëpres kryeministrin e Shqipërisë këtu në Departamentin e Shtetit. Kryeministri dhe vendi i tij kanë qenë partnerë të ngushtë me Shtetet e Bashkuara të Amerikës në NATO si pjesë e misionit tonë në Afganistan dhe ne kemi një marrëdhënie të gjerë e të thelle që ne e vlerësojmë maksimalisht. Mezi pres të diskutoj me kryeministrin Berisha për shumë çështje për të cilat ne po punojmë si në aspektin bilareteral, rajonal dhe global. Zoti kryeministër mirëserdhët", deklaroi Clinton, raporton Balkanweb. Nga ana e tij, shefi i qeverisë shqiptare e cilësoi zonjën Clinton si një mike të madhe të Shqipërisë dhe theksoi se do ta bindë atë të vizitojë Shqipërinë në kuadër të 100-vjetorit të pavarësisë. “Jam shumë i lumtur dhe shumë mirënjohës që ndodhem këtu të takoj sekretaren Clinton. Ajo është një mike e madhe e vendit dhe e kombit tim. Unë po ju rrëfehem këtu. Një prej qëllimeve të këtij takimi është ti kërkoj asaj të vijë në Shqipëri në 100 vjetorin e pavarësisë. Shtetet e Bashkuara të Amerikës kanë luajtur një rol kryesor në të gjitha momentet më të vështira të historisë tonë. Kështu që çdo shqiptar do të jetë krenar dhe i lumtur për këtë vizitë të saj. Gjithashtu ne do të diskutojmë për shumë çështje të interesit tonë dypalësh. Shqipëria ka patur një privilegjin e jashtëzakonshëm të mbështetet nga ky vend i madh, nga administrata e presidentit Obama, nga Sekretarja Clinton, në të gjitha përpjekjet e saj për të ndërtuar një demokraci të bazuar në lirinë e tregut. Faleminderit shumë”, deklaroi kryeministri Berisha. Gjatë vizitës së tij në SHBA, ai do të takohet me kryetarin e Dhomës së Përfaqësuesve, i cili është dhe njëkohësisht kreu i Kongresit të SHBA, zotin John Boehner. Gjithashtu, Kryeministri do të ketë në Washington DC, takime me personalitete të tjera si senatorja Jeanne Shaheen, Kryetare e Nënkomitetit për Çështjet Evropiane, zoti Richard Morningstar, i Dërguari i Posaçëm i Sekretares së Shtetit për Energjinë në Euroazi, etj.