Nimic pa propozim edhe pas takimeve në Athinë

Nimic, siç transmetoi televizioni shtetëror grek ERT, pas takimit deklaroi se nga Dimas ka marrë bindje se Qeveria e Greqisë ka dëshirë të sinqertë për zgjidhjen e çështjes së emrit

Athinë, 22 shkurt - I dërguari i posaçëm i sekretarit të përgjithshëm të KB-së për çështjen e emrit Methju Nimic sot pasdite në Athinë pati takime të ndara me kryeministrin Lukas Papadhimos dhe me shefin e diplomacisë greke, Stavros Dimas. Nimic, siç transmetoi televizioni shtetëror grek ERT, pas takimit deklaroi se nga Dimas ka marrë bindje se Qeveria e Greqisë ka dëshirë të sinqertë për zgjidhjen e çështjes së emrit. Dimas e ka inkurajuar edhe për t'i vazhduar përpjekjet për gjetjen e zgjidhjes së pranueshme të përbashkët në kuadër të procesit që po zhvillohet nën patronazhin e KB-së.

I pyetur nëse kriza ekonomike në Greqi dhe zgjedhjet e ardhshme do të ndikojnë në proces, Nimic theksoi se i kupton vështirësitë me të cilat po përballet Athina dhe shpreson që do të tejkalohen, por se vendi edhe tani ka Qeveri funksionale e cila mund të përballet me problemet siç është çështja e emrit. Përndryshe, para takimit me ndërmjetësuesin e KB-së, Dimas ka pasur takime konsultative me Papadhimosin dhe me liderin e PASOK-ut, Jorgos Papandreu. Nndërkohë, Jorgos Karaxhaferis lideri i partisë ultradjathtise LAOS e cila participon në Qeverinë e përkohshme në letrën e dërguar deri te Dimasi kërkon për zgjidhjen eventuale për emrin të shprehen qytetarët grekë në referendum. Ai njëherësh kërkoi edhe takim të Komitetit parlamentar për punë të jashtme dhe mbrojtje në të cilin do të shqyrtoheshin ngjarjet e fundit në bisedimet për emrin.

Ndërmjetësi i KB-së Nimic për në Athinë ka udhëtuar nga Shkupi, ku të hënën bisedoi me presidentin e Maqedonisë, Gjorge Ivanov, me kryeminsitrin Nikolla Gruevski dhe me ministrin e Punëve të Jashtme, Nikolla Poposki.

Pas takimeve ai deklaroi se nuk sjell propozime të reja, por se ka për qëllim të gjejë mënyrë që të përshpejtohen bisedimet për zgjidhjen sa më të shpejtë të kontestit për emrin, i cili, siç theksoi, e preku rajonin dhe sigurinë botërore. Nimis tha se në Shkup qartë i janë treguar pozitat e Maqedonisë dhe dëshirat e sinqerta për zgjidhjen e problemit, dhe se do t'ua transmetojë autoriteteve në Athinë.